Gidili na sa lungsod sa Tubay ang pagbaligya sa mosketiro nga adunay tambal o insecticide batok sa lamok. Kini basi sa Municipal Ordinance No. 2009-13 nga gipangamahan ni SB Member Jary Mondejar.

Nagsugod kini sa pagkadiskubre sa Municipal Sanitary Inspector nga adunay mga lumulupyo sa Tubay nga libre’ng nakadawat sa maong moskitero apan imbis gamiton, gibaligya hinoon kini. Buhat nga hugot nga gidili sa gobyerno tungod kay tabang man kini sa mga lumolupyo sa mga lugar nga adunay kaso  sa dengue.

            “Dili dapat pahimuslan sa pipila lang ka mga tao ang pagpamaligya niining mga moskitero kay libre man kini nga gipanghatag sa DOH ngadto sa katawhan. Lu-oy man pod intawon tong mga tao nga way ikabayad kay dili na hinuon makabaton ani nga mga mosketiro,” matod pa ni SB Mondejar.

            Tungod kay giaprobahan naman kini sa Sangguniang Panlalawigan sa paningkamot ni Bokal Aquino W. Gambe, ang masakpan nga mamaligya pagasilutan tugbang sa kantidad sa maong mosketiro o  pagkapreso sa “Arresto Menor” depende sa pagbuot sa korte. (CEPardillo)