Aron mas masabtan pa ang bag-ong sistima ning umaabot nga eleksyon, nagpahigayon og aktwal nga Precint Count Optical Scan (PCOS) machine demonstation ang pangagamhanang probinsyal  pinaagi sa COMELEC Regional Office kaniadtong Enero 15, 2010 sa covered court sa kapitolyo.

Ang PCOS mao na ang pagagamiton sa pagboto karon umaabot nga eleksyon sa Mayo 2010.

Si Asst. Regional Director ug kasamtangan nga Provincial Election Supervisor Atty. Roland G. Edayan maoy naghatag sa overview o sa kinatibok-an nga gamit sa maong makina ug kini gisundan usab sa detalyado nga katin-awan ni Ms. Tarcesia Bayot gikan usab sa maong buhatan.

 Sumala ni Ms. Bayot, ang bag-ong balota karon nga gamiton sa PCOS adunay mga bar codes ug uban pang security codes nga maoy basahon sa machine. Iyang gipahayag usab nga kinahanglan dili mahugawan ang balota, dili magisi o mapilo aron dili i-reject sa machine. Aduna usab gipahayag si Ms. Bayot nga kinahanglan nga tumanon kung pila ang sakop sa Sangguniang Panlalawigan, Sangguniang Panlungsod ug Sangguniang Bayan kay kung kini masobrahan, mahimong invalid ang balota. Kung adunay brown-out panahon sa eleksyon, ang PCOS adunay built-in back up battery nga molungtad og 16 ka oras.

Ang balota adunay makita nga mga oval sa kilid sa matag pangalan sa mga kandidato ug kini mao ang itoman sa ballpen nga adunay ultraviolet ink nga dili basta-basta mapapa. Dili ka mahatagan utro og balota kung masayop ka pag itom. Kinahanglan nga mapuno ang oval sa pag itom. Ang pagboto magasugod sa alas 7 sa buntag ug kini mahuman sa alas 6 sa gabii. Pag-abot sa oras nga isira na ang pagboto, kanbason dayon kini   pinaagi ra usab sa PCOS. Ang Board of Election Inspector (BEI) adunay gigunitan nga security key ug iyang i-enter ang pin code aron ang machine makapagawas og initialization report, ayha pa kini magsugod pag-dawat sa mga official ballots aron maihap ang boto.

Adunay mga commands nga makita sa machine ug kini maoy pagasundon sa BEI aron mogawas ang resulta sa pag-ihap. Kung mahuman na ang counting of votes, ang BEI mo-enter na usab og PIN No. aron ang makina makaprint dayon og walo (8) ka kopya sa election result ug sulod sa duha ka minuto, kini ma-transmit na didto sa Municipal Board of Canvassers (MBOC), Provincial Board of Canvassers (PBOC), Comelec Server, Kapisanan ng mga Brodkasters ng Pilipinas (KBP), Minority party, Majority party, Citizen’s Arm ug Public website. Pagkahuman sa walo ka kopya, mo-print na usab og 22 copies alang sa nagkalainlai’ng partido ug sa uban pang mga hintungdan.

Tungod sa mga gipamahayag sa COMELEC kabahin sa kagamitan sa PCOS gilauman nga makunhod, kung dili man mawala, ang pagpanlimbong sa eleksyon ug dugang pa madali usab ang pagkuha sa final result.

Ang maong panagtigum gitambungan nila ni Bise Gobernador Enrico R. Corvera, mga Bokal Ernie M. Ceniza, Alan M. Famador, Rey G. Jamboy ug James T. Reserva, mga opisyales sa mga barangay ug lungsod sa Buenavista, Carmen, Nasipit, Las Nieves, Cabadbaran ug R.T. Romualdez. (CEPardillo)