"Think global.”

Kini ang awhag ni Mayor Francisco Y. Chan, Jr. sa iyang State of the Municipality Address (SOMA) nga giluwatan niya panahon sa sesyon regular sa Sangguniang Bayan didto sa J.P. Satorre Gymnasium atol sa “Adlaw sa Buenavista” kaniadtong Enero 15.

Ang pagpakanaog sa SOMA ubos sa kamandoan sa Municipal Ordinance No. 07-2007 nga gipalabang sa Sangguniang Bayan kaniadtong Septembre 17, 2007.

Matod pa sa pamuno lungsod nga ang panghunahuna nga “global” adunay lawom nga kahulogan. “Aduna kini gamut sa bibliya ug nagpasabot kini nga panagdait sa matag usa sa katilingban, sa ato pa, ang tawo dili mabuhi nga mag-inusara,” dugang sa mayor.

Kini ang bugtong paagi, ingon sa mayor, nga makab-ot nato ang “economically stable community” ug “God-centered citizenry.”

Gipasundayag pinaagi sa video ang mga proyekto ubos sa iyang administrasyon sa miaging tuig 2009.

Gilatid usab niya ang iyang mga programa kon tagaan og higayon nga makapadayon pagpangalagad sa iyang ikatulo ug kataposang termino.(Buena Monitor)