Pinaagi sa Municipal Ordinance Numero 02 nga gipangamahan ni SB Member Wilfredo M. Taglucop, mugnaon na sa lungsod sa Carmen ang Dog and Rabies Control Coordinating Council (DRCCC) nga gitahasan sa pagsugpo sa rabies sa tibook lungsod.           

Ang DRCCC tukuron dili lamang sa municipal level kundi lakip na sa barangay level aron mas mapalapad ang kampanya batok rabies.           

Subay sa maong ordinansa, gimandoan ang tanang dog owners nga kanunay’ng nakahikot ang ilang mga iro o anaa kini sulod sa safe nga luna aron dili kini makahasol sa ubang tawo.

Gimando usab  ang pagpabakuna (vaccination) sa mga iro kada tuig aron siguradong layo kini sa sakit. Kargo sa tag-iya ang tanang galastoson kung adunay mapaakan nga tawo ang ilang iro.

Ang mga itoy kung anaa na sa pangidaron nga 3 ka bulan gikinahanglan na usab ang pagparehistro niini.

Dugang pa, i-impound sa pangagam-hanang lokal sa Carmen ang mga iro nga makit-ang magsuroysuroy sa dalan. Ang tag-iya nga mo-claim gi-kinahanglan nang mobayad og Baynte-singko (P25.00) pesos matag adlaw sa maong pag-impound.

Ubos sa Seksyon 25 niini nga ordinansa, multahan ang bisan kinsang mapamatud-ang mulapas sa unsa mang probisyon niini gikan Usa ka libo (P1,000.00) ka pesos hangtod Duha ka libo ug Lima ka gatos (P2,500.00) ka pesos lakip na ang pagka-priso sulod sa napulo (10) hangtod traynta (30) ka adlaw.

Kini nga ordinansa gi-aprobahan na sa Sangguniang Panlalawigan sa pagpaningkamot ni Bokal Venerando D. Atupan.